✍️ التعريف بشعبة القانون
سلام عليكم، أنا طالب بشعبة القانون الخاص، وجيت اليوم نوضح بعض الغموض اللي كيواجه الطلبة الجدد ونشرح ليهم شنو هي شعبة القانون؟ وكذا الفرق بين القانون العام والقانون الخاص.
أول حاجة خاصنا نعرفوها هي الفرق بين القانون العام والقانون الخاص:
- القانون العام: كيدرس العلاقة بين الدولة والأفراد، كيف كتنظم الإدارات (القانون الإداري)، الميزانية، والأنظمة الدولية… يعني منين كتكون الدولة طرف رئيسي فالعلاقة (مثلاً علاقتك مع إدارة عمومية)، فهنا كتخضع للقانون العام.
- القانون الخاص: كينظم العلاقات بين الأفراد (مثلاً جريمة، نزاع حول الإرث، عقد تجاري...). كتقرا فيه القانون الجنائي، التجاري، المدني، العقاري، قانون الشغل… إلى غير ذلك.
✅ نصائح مهمة للطلبة الجدد:
شعبة القانون كتطلب الفهم والحفظ بجوج. فالعام الأول كيقرا الطالب 14 مادة، مقسّمة على سميسترين (كل واحد فيهم 7 موديلات).
السميستر الأول: المواد فيه ماشي صعاب، كيعطيوك مدخل عام للقانون، ويلا خصصتي شوية وقت وضبطتي المنهجية القانونية، غتمشي مزيان.
السميستر الثاني: كتبدأ تصعاب المواد شوية، ولكن يلا كنتي منظم وغادي مع الوقت، غتقدر تواكب بسهولة.
العام الثاني: كتكون دخلتي فالأجواء ديال الجامعة، وعارف كيفاش تتعامل مع الموديلات. إلى ڤاليديتي العام الأول، غادي يكون عندك طريق سهل نسبياً. أما يلا بقاو الكريديات، خاصك مضاعفة الجهد.
العام الثالث: عام الحسم. يلا كنتي دوزتي العامين الأولين بخير، فالإجازة قريبة. أما يلا بقات عندك مواد، خاصك الصبر وتنظيم الوقت، وتحضير مبكر للامتحانات. راه الريمونتادا ممكنة.
🎯 آفاق الشعبة:
شعبة القانون فيها آفاق مهنية وأكاديمية واسعة، ولكن كاين منافسة قوية حيت الطلبة فيها كثار. خاصك تجتهد باش تجيب نقط عالية وتميز راسك، سواء كنت باغي تدخل سوق الشغل أو تكمل فقرايتك فـ الماستر.
خلاصة: نظم وقتك، خدم من الأول، متخليش التحضير حتى للآخر، وكون متأكد أن التعب ديالك غايجيب نتيجة.
بالتوفيق للجميع ❤️
